Stjörnufans og Þríeykið syngja saman

Stefán Ó. Jónsson skrifar 7. apríl 2020 20:20

Nei, þetta er ekki vetrarbrautin. Bara heill haugur af stjörnum. skjáskot

Óhætt er að segja að stórskotalið íslensk tónlistarfólks hafi tekið höndum saman við gerð meðfylgjandi myndbands við lagið „Ferðumst innanhúss.“ Lagið er betur þekkt sem „Góða ferð“ en er núna flutt við nýjan texta eftir Leif Geir Hafsteinsson.

Leifur Geir samdi textann helgina 28. til 29. mars og segir hann að í kjölfarið hafi kviknað sú hugmynd að gera myndband við lagið í anda „We are the world.“ Safna saman stórpoppurum Íslands og þríeykinu svokallaða, fá þau til að taka höndum saman við að hamra heim skilaboðin: „Hlýðum Víði“ og „Ferðumst innanhúss“ núna fyrir páskana.

Afraksturinn má sjá hér að neðan. Þátttakendur hittust aldrei á meðan ferlinu stóð, voru heima hjá sér við tökur og þannig voru allar reglur um nánd, samkomubann og það að halda sig heima virtar við vinnslu lagsins. Fyrir neðan spilarann má jafnframt nálgast ná textann við lagið, auk upptalningar á öllum þeim sem birtast í myndbandinu.

Aðstandendur myndbandsins í stafrófsröð

Nafn	Hlutverk
Birgitta Haukdal	Söngur
Friðrik Dór	Söngur
Glowie	Söngur
Greta Salóme	Strengir, Söngur

Halldór Gunnar Pálsson, Fjallabróðir	Tónlistarstjórn, hljóðfæraleikur, söngur, framkvæmd
Helgi Björnsson	Söngur
Hildur Vala Einarsdóttir	Söngur
Ingó Veðurguð	Söngur
Jóhanna Guðrún Jónsdóttir	Söngur
Jón Gunnar Geirdal	Markaðssetning og almannatengsl
Jón Jónsson	Söngur
Jón Ólafsson	Píanó, Söngur
Kristinn Óli Haraldsson - Króli	Söngur
Kristján Steinn Leifsson	Söngur, Trompet
Leifur Geir Hafsteinsson	Texti, hugmynd, framkvæmd
Þórólfur Guðnason	Söngur
Alma Möller	Söngur
Víðir Reynisson	Söngur
Ragnhildur Gísladóttir	Söngur
Saga Júlía Benediktsdóttir	Dúlla – óskar góðrar ferðar í lokin
Salka Sól	Söngur
Sighvatur Jónsson	Myndband, klapp
Sverrir Bergmann	Söngur

Texti lagsins

Ferðumst innanhúss

Þú veist það eru viðsjárverðir tímar

með landamæri lokuð víðast hvar

En sútum ekki örlög, heldur húkkum okkur far

Í ferðalag og freistum gæfunnar

Góða ferð, góða ferð, góða ferð

þetta‘er tækifæri‘af allra bestu gerð

Já tínum til vort trúss og ferðumst innanhúss

Góða ferð, verum sæl með góða ferð

Í tveggja metra fjarlægð kæri vinur

og ekki fleiri‘ en nítján á sama stað

Í takmörkunum lífsins þá líst mér best á það

að bregða mér í ilmolíu-bað

Góða ferð, góða ferð, góða ferð

þetta‘er heima-SPA af allra bestu gerð

Oh við elskum svona stúss, að dúllast innanhúss

Góða ferð, verum sæl með góða ferð

Ef leiðigjörn er orðin blessuð stofan

og eldhúsið svo hversdagslegt og grátt

Þá ævintýrin bíða, það toppar enda fátt

góða bílskúrsútilegu, yfir nátt

Góða ferð, góða ferð, góða ferð

þetta‘er útilega af allra bestu gerð

Já tínum til vort trúss og kúrum innanhúss

Góða ferð, verum sæl með góða ferð

Nú þurfa allir þétt að standa saman

og koma COVID-stríðinu á skrið

Ef efla viljum lýðheilsu og finna sálarfrið

Við hlýðum Víði og ferðumst heima við!

Góða ferð, góða ferð, góða ferð

þetta‘er upplifun af sérstökustu gerð

Já, fáum úr því rúss, að ferðast innanhúss

Góða ferð, verum sæl með góða innanhúsferð

Góða ferð, verum sæl með góða ferð

Samkomubann á Íslandi Tónlist Grín og gaman

Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.