Það væri heillavænlegt ef Íslendingum tækist að nýta núverandi ástand í efnahags- og þjóðfélagsmálum til þess að búa í haginn fyrir framtíðina að sögn fjármálaráðherra. Vonast hann þannig til þess að tímann megi nýta til þess að tryggja meiri afköst, framleiðni og samkeppnishæfni landsins, svo að úr öskunni rísi „Ísland í uppfærslu 2.0.“
Þetta sagði Bjarni Benediktsson fjármálaráðherra að loknum fundi ríkisstjórnarinnar í Ráðherrabústaðnum í dag, þar sem m.a. var til umræðu framtíð þingstarfa og frestun á hinum ýmsu stjórnarfrumvörpum í ljósi óvissunar um þingstörf í vor. Aðspurður um hvaða mál þar sé um að ræða sagði Bjarni að heilt yfir „skipti ekki öllu“ hvort þessi mál klárist á vorþingi eða í haust, án þess þó að nefna tiltekin mál í því samhengi.
Bjarni sagði að sama skapi að engin spurning sé um að efnahagslegu áhrifin af faraldrinum séu miklu meiri en stjórnvöld sáu fyrir sér í upphafi marsmánaðar. Í þessu samhengi má t.d. nefna að umsóknir um hlutabætur á móti skertu starfshlutfalli, eitt úrræða sem stjórnvöld kynntu til að draga úr þörfum á uppsögnum í faraldrinum, eru nú rúmlega 31 þúsund talsins. Upphaflegar áætlanir gerðu ráð fyrir að þær yrðu um 20 þúsund.
Bjarni segir þannig að ef svartsýnni spár fyrir 2020 gangi eftir, t.d. um komu ferðamanna, þá séum „við að sjá mesta samdrátt hér í jafnvel heila öld.“
Það breyti því samt ekki að sögn Bjarna að Íslendingar þurfi að nýta tímann vel til að búa í haginn fyrir framtíðina. „Finna hvar okkar styrkleikar liggja. Gera ráðstafanir þar sem við vitum að við getum gert betur og undirbúa okkur fyrir mikla sókn þegar þessu ástandi lýkur,“ sagði Bjarni.
Úr öskunni rísi sterkara og tilbúnara samfélag
„Þannig að við þurfum að sýna ótrúlega hæfni til þess að bregðast við því sem er aðkallandi núna og brýnt að við leysum strax í nærtímanum, til dæmis vegna þess að fyrirtæki eru að loka hreinlega. Við þurfum að styðja menn í gegnum það tímabil þar sem samkomubannið gildir,“ sagði fjármálaráðherra ennfremur.
Því eigi að nota tímann til þess að „taka til þar sem við eigum enn eftir að gera það“ með það fyrir augum að tryggja meiri afköst, framleiðni og auka samkeppnishæfni Íslands. Þannig megi tryggja það að samfélagið allt verði „sterkara og tilbúnara,“ þegar horfurnar batni. „Ég segi bara, reynum að koma út úr þessu öllu saman með Ísland í uppfærslu 2.0,“ sagði Bjarni.
Viðtalið við hann má nálgast í heild hér að ofan. Þar ræðir Bjarni m.a. um það að augljóst sé að stjórnvöld þurfi að ganga lengra í viðbrögðum sínum við efnahagsþrengingunum. Róðurinn þyngist í hverri viku.
