Fylgist með jólasölunni aðeins 14 ára

„Þessir dagar eru þaktir þéttri dagskrá hjá mér því ég hef nýlokið við að gefa út dvd-diskinn minn, Auga fyrir auga," svarar Árni Beinteinn Árnason, 14 ára, þegar Vísir spyr hann frétta.

„Ég fer daglega í helstu búðir til að athuga hvort að allt sé ekki á sínum stað og fylgjast með sölunni og er svo að reyna að láta fólk vita af þessu eftir fremsta megni."

Leikstýrði 12 ára

„Ég gerði Auga fyrir auga þegar ég var 12 ára og nú er ég nýorðinn 14 ára. Á þessu ári var mér tvisvar boðið utan á kvikmyndahátíð, í annað skiptið með Duggholufólkinu eftir Ara Kristinsson og hins vegar með minni eigin mynd, Auga fyrir auga," segir Árni.

„Myndin hentar krökkum á aldrinum 7-14 ára en fjölskyldan getur auðvitað haft gaman af honum því á honum er ekki bara myndin heldur líka góður hálftími af skemmtilegu aukaefni."

Jólin hjá Árna

„Jólin nálgast óðfluga og ég hef lítið getað leitt hugann að þeim hingað til. Á til dæmis eftir að kaupa allar jólagjafir og jólatréð er ekki enn komið upp," segir Árni.

„Það verður rosalega gaman að geta kannski slappað af í nokkra daga áður en törnin hefst að nýju en nýtt og spennandi ár er framundan og fullt af tækifærum," segir Árni og tekur fram að hann mun árita diskinn í Hagkaupum í Smáralind klukkan 4 í dag.

Stiklurnar má sjá á youtube.com/beinteinn