Grunur um sjálfsmorð

Karlmaður á fertugsaldri og barnungur sonur hans létu lífið þegar sprengja sprakk í íbúðarhúsi í Óðinsvéum í morgun. Kona mannsins er einnig lífshættulega slösuð en lögregla telur að faðirinn hafi framið sjálfsmorð með þessum skelfilega hætti. Sprengingin var gríðarlega öflug svo þak hússins þeyttist af því nánast í heilu lagi og skall svo niður aftur. Tveir fundust látnir, þrjátíu og fimm ára karlmaður og fimm eða sex ára sonur hans. Kona mannsins og móðir drengsins er einnig lífshættulega særð. Lögreglan telur að fjölskyldufaðirinn hafi notað allt að kíló af sprengiefni og handsprengju að auki til að fremja sjálfsmorð og taka fjölskylduna með sér í dauðann. TV2 í Danmörku segir manninn hafa verið í danska hernum og að hann hafi verið nýkominn heim frá Bosníu. Hann hafði sent fjölskyldunni kveðjubréf þar sem greinilegt var að maðurinn hugðist binda enda á líf sitt vegna persónulegra vandamála. Lögreglan segir ekki fara milli mála að um harmleik sé að ræða, ekki hryðjuverk. Sprengjusveit danska hersins rannsakaði vettvang sprengingarinnar í dag og nágrönnunum var eðlilega brugðið, enda skammt síðan hryðjuverkamenn höfðu í hótunum við Dani.