Nýjar myndir á nýjum fernum

Farið er að dreifa mjólkurfernum með nýju útliti, en þær eru skreyttar með myndum tengdum íslensku máli. Það voru nemendur í 7., 8., 9., og 10. bekk sem gerðu myndirnar en textana gerði Þorvaldur Þorsteinsson, rithöfundur og myndlistarmaður, með aðstoð Íslenskrar málnefndar. Í fréttatilkynningu frá Mjólkursamsölunni segir að myndirnar verði fyrst um sinn á 1 1/2 lítra léttmjólkurfernum en á næstu vikum fylgi aðrar ný- og léttmjólkurfernur í kjölfarið. Alls voru 62 myndir valdar til að prýða fernurnar og munu þær allar birtast ásamt skýringartextum á mjólkurfernum á þessu ári, en hvort tveggja er afrakstur samkeppni í grunnskólum landsins í myndlist og móðurmáli sem nefndist Fernuflug.