Íbúar New Orleans tínast heim

Íbúar New Orleans eru nú farnir að hlýða kalli borgarstjórans og tínast heim aftur, þrátt fyrir andstöðu alríkisstjórnarinnar. Rey Nagin borgarstjóri hefur lýst það ætlun sína að opna New Orleans á nýjan leik, hverfi fyrir hverfi. Alríkisstjórnin í Washington er á móti þessu og segir að borgin sé ennþá hættusvæði. Margir íbúanna kæra sig kollótta um hvað alríkisstjórninni finnst og hafa hlýtt kalli borgarstjóra síns. Þeir eru enda eðlilega forvitnir um hvað hafi orðið um heimili þeirra. Ekki ætla þó allir að snúa aftur fyrir fullt og allt. Bush forseti hefur persónulega lýst áhyggjum sínum af því að opna New Orleans á nýjan leik. Hann segir að menn óttuðust meðal annars að stormurinn Rita, sem nú stefnir á Flórída, geti breyst í fellibyl og valdið rigningum í New Orleans og rofið flóðgarða á nýjan leik.