Ráðherralisti í Noregi

 Ráðherralisti nýrrar ríkisstjórnar í Noregi verður kynntur á ríkisráðsfundi í norsku konungshöllinni í Osló á mánudag. Viðræðum forystumanna rauðgræna bandalagsins svonefnda, sem hlaut meirihluta þingsæta í þingkosningunum 12. septemer síðastliðinn, lauk í ráðstefnumiðstöðinni Soria Moria í gær. Norskir fjölmiðlar telja fullvíst að Kristín Halvorsen, formaður Sósíalíska vinstriflokksins, verði fjármálaráðherra í ráðuneyti Jens Stoltenberg, formanns Verkamannaflokksins og verðandi forsætisráðherra. Búist er við því að Åslaug Haga, formaður Miðflokksins, verði félagsmálaráðherra og fari með málefni sveitarstjórna. Stjórnmálarýnendur í Noregi telja fullvíst að Jonas Gahr Störe frá Verkamannaflokknum verði utanríkisráðherra. Terje Riis-Johansen er orðuð við stól landbúnaðarráðherra og fleiri hafa verið nefndir sem líklegir ráðherrar. Flokkarnir þrír hlutu samtals 87 þingsæti af 169 og felldu borgaralega stjórn Kjells Magne Bondevik.