Norðmaður tekur við Hólmberti og félögum

Skoska meistaraliðið Celtic sem íslenski framherjinn Hólmbert Aron Friðjónsson leikur með hefur staðfest ráðningu á Norðamanninum RonnyDeila sem knattspyrnustjóra félagsins.

Celtic hóf leit að nýjum stjóra þegar Neil Lennon sagði nokkuð óvænt upp starfi sínu í síðasta mánuði og voru menn á borð við RoyKeane og SteveClark orðaðir við starfið.

Keane settist að samningaborðinu með Celtic, sem hann spilaði með eftir að hann hætti hjá Manchester United árið 2005, en ákvað að semja ekki.

Ronny Deila er 38 ára gamall, en hann gerði Stromsgodset að norskum meisturum á síðasta tímabili. Það var fyrsti meistaratitill liðsins í 43 ár.

Sem fyrr segir leikur Hólmbert Aron Friðjónsson með Celtic. Hann gekk í raðir félagsins í desember á síðasta ári en kom ekkert við sögu hjá því á tímabilinu.

Hann skoraði þó grimmt fyrir U20 ára lið Celtic og er vonandi að hann fái tækifæri hjá nýjum stjóra.