Sumarið stimplar sig rækilega inn

Það er spáð bongóblíðu um allt land um helgina og landsmenn eru þegar farnir að skipuleggja dagskrána enda löng helgi framundan.

Einar Sveinbjörnsson, veðurfræðingur á Veðurvaktinni, segir að líklega haldist hann þurr um allt land.

„Það verður fyrirtaksveður á landinu öllu um helgina. Það er komið sumar,“ segir Einar.

Hann segir að logninu gæti þó fylgt kaldari hafgola. „Það sem gerist í svona veðurlagi er að það getur lagst þoka með austurströndinni og eins í útsveitum og á Húnaflóanum. Inn til landsins ætti sólin að skína glatt.“

Einar gefur þó lítið fyrir björtustu vonir manna. „Það hefur einhver verið að nefna hitabylgju en ég er ekki alveg til í að tala um það. Hitinn ætti að komast yfir tuttugu stig þar sem best lætur. Við förum yfirleitt ekki að tala um hitabylgju fyrr en hann er kominn yfir 25 stig.“

Einar segir að landsmenn allir muni njóta veðurblíðunnar. „Það er í raun bara spurning um hvar verður hafgola og skýjafar eða þoka við sjávarsíðuna. Loftið yfir landinu er hlýtt og vænt. Það verður bjart sólskin og dásemdar sumarveður.“

Það er þó erfitt að segja til um það hvort fólk eigi að fara að venja sig við sandalana áfram. „Það er ekkert kalt loft á leiðinni en hvar og hvenær hann dembir úr sér, það er meiri óvissa með það.“

Sumarið byrjar að minnsta kosti óvenju vel. „Það má segja það að hitinn núna minnir frekar á júlídaga heldur en blábyrjun sumars og þannig verða að öllum líkindum þessir dagar framundan um helgina.“

Rut Guðmundsdóttir, forstöðukona sundlaugarinnar á Borg í Grímsnesi, segir að búið sé að manna aukavaktir fyrir laugina um helgina.

„Stemningin er góð. Við búumst við því að bústaðir og tjaldsvæðin í kring fyllist. Yfirleitt byrjar sumarið ekkert fyrr en eftir 17. júní svo kannski fáum við með þessu aukahelgi. Það er allt klappað og klárt.“

Í ísbúðinni Valdísi úti á Granda er allt á suðupunkti fyrir helgina.

„Stemningin er bara þannig að það er aukafólk á vakt að baka vöfflur. Við erum að undirbúa okkur undir stríð. Nei, djók,“ segir Anna Svava Knútsdóttir sem rekur ísbúðina.

Á góðum sólardögum tekur verslunin á móti rúmlega þúsund viðskiptavinum. „Þetta verður ekkert mál því við erum með svo mikið af góðu starfsfólki. Það er hámark að bíða í tólf mínútur.“