Innlent

Bannað að birta mynd af Bubba með sígó á gafli Borgó

Jakob Bjarnar skrifar
Fræg mynd af Bubba með sígarettu í munnvikinu þykir með öllu ótæk í dag.
Fræg mynd af Bubba með sígarettu í munnvikinu þykir með öllu ótæk í dag.

„Að gefnu tilefni,“ segir Bubbi á Facebooksíðu sinni, og gefur til kynna með táknkarli að honum sé ekki skemmt. „Er samkvæmt lögum bannað að auglýsa tóbak með mynd af mér með sígarettu á gafli Borgarleikhúss.“

Bubbi segir að slíkt skilgreinist sem auglýsing en eins og fram hefur komið hefur markaðsdeild Borgarleikhússins breytt frægri mynd af Bubba svo auglýsa megi söngleik hússins sem byggir á lífi hans. En þar er kóngurinn vígalegur með sígarettu í munnvikinu. Fram hefur komið að þetta sé vegna þess að Facebook taki það ekki í mál að slík mynd sé notuð í auglýsingar sem birtar eru á samfélagsmiðlinum.

Markaðsdeild Borgarleikhússins fjarlægði sígarettuna úr munnviki kóngsins með hjálp photoshop-forritsins.

„Facebook virðist halda að við séum einhver búlla á Íslandi sem er að auglýsa kynlíf og sígarettur og hafa engan tíma fyrir slíkan ólifnað,“ sagði Pétur Rúnar Heimisson, markaðsstjóri Borgarleikhússins í samtali við Fréttablaðið. Leikhúsið hefur lent í því að vera bannað að auglýsa leiksýningar og fékk viðvörun um að síða þeirra væri komin á svartan lista.

Viðbrögð við þessari tilkynningu Bubba er afdráttarlaus og á einn veg. Fólk furðar sig á þessu ofboði og telur að um sé að ræða sögufölsun á forsendum gengdarlausrar forræðishyggju. Þannig segir til dæmis formaður Viðreisnar, Þorgerður Katrín Gunnarsdóttir við það tækifæri: „Meira ruglið“.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.