Hefner-kærustur í hár saman

Hinn aldraði Hugh Hefner hefur ekki mikla stjórn á stúlknastóðinu sínu. Heilmikil illindi munu vera á milli kærasta hans, og brutust út slagsmál á milli tveggja þeirra á dögunum.

Það voru þær Kendra Wilkinson og Holly Madison sem létu vel snyrtar klærnar tala, en samkvæmt heimildum TMZ er ófriðurinn tilkominn vegna valdambaráttu á milli stúlknanna. Þrjár af kærustunum sjö hafa ávallt barist um athygli klámkóngsins, en brjóstagóða blondínan Holly hefur hins vegar lengst af verið uppáhaldsdaman. Hún er sú sem gistir inni hjá Hefner og ku eiga sér draum um að taka við Playboy veldinu að honum gengnum.

Þetta er Kendra ekki ánægð með. Hún samþykkir Holly ekki sem „fyrstu kærustu" og getur ekki einu sinni verið í sama herbergi og hún, án þess að til ryskinga komi. Það eru svo ekki jafn slæmar fréttir fyrir alla. Tökulið „The Girls Next Door", raunveruleikaþáttar sem fjallar um lífið í Playboysetrinu, var einmitt á staðnum þegar slagsmálin brutust út, og festu herlegheitin öll á filmu.