Innlent

Leið­togum stjórnar­flokkanna brugðið og vilja ýtar­lega rann­sókn

Heimir Már Pétursson skrifar

Leiðtogum stjórnarflokkanna var öllum brugðið við fréttirnar af meintum mútugreiðslum og öðru háttarlagi Samherja í Namibíu. Ráðherrarnir eru allir sammála um nauðsyn þess að þar til bær embætti saksóknara og skattayfirvalda rannsaki þessi mál ofan í kjölinn.

Katrín Jakobsdóttir forsætisráðherra sagðist hafa verið brugðist og ef ásakanir reynist réttar sé málið Samherja til skammar og stórt áhyggjuefni fyrir íslenskt atvinnulíf í heild sinni.

„Það liggur líka fyrir að íslensk stjórnvöld munu eiga samráð við stjórnvöld í öðrum löndum um framhald málsins.“

Hvaða lönd eru það?

„Auðvitað þau lönd sem þarna koma við sögu, eðli málsins samkvæmt,“ segir Katrín.

Þarf kannski að endurskoða það hámark sem hvert og eitt útgerðarfrirtæki má eiga af veiðiheimildum?

„Við gerum auðvitað þá kröfu, alveg sama hvað fyrirtæki eru stór, að þau fari að íslenskum lögum og þau fari að lögum í löndum sem þau starfa. Það er stóra málið í þessu máli. En þetta sýnir okkur líka  að það er kannski full þörf á að fara yfir hvað er hægt að gera betur. Ég vil minna á í því samhengi á frumvarp sem ég hef lagt fram á Alþingi og verður vonandi tekið til umræðu hér á næstunni um vernd uppljóstrara,“ segir forsætisráðherra.

Allir stjórnarflokkarnir ásamt Samfylkingu hafa fengið styrki frá Samherja í gegnum árin, þar af Vinstri græn rétt rúmlega milljón frá árinu 2013. 

Allir stjórnarflokkarnir hafa fengið styrki frá Samherja í gegnum árin. Þá hefur Samfylkingin einnig fengið styrk frá fyrirtækinu en flokkurinn tilkynnti í dag að hann ætlaði að skila styrkjunum en þó ekki til Samherja heldur í þróunarstarf í Namibíu. grafík/hafsteinn

Kannski er hluti af því illa fengið fé. Er við hæfi að stjórnmálaflokkar haldi slíku fé?

„Ég sendi tölvupóst á mitt fólk í stjórn Vinstri grænna í morgun og lagði til að við myndum skoða það að skila þessum styrkjum,“ segir Katrín.

Formenn hinna stjórnarflokkanna svöruðu þessari spurningu með öðrum hætti en Katrín eins og sjá má í viðtölum við ráðherrana í heild sinni á Vísi, ásamt sjónvarpsviðtali við Kristján Þór Júlíusson sjávarútvegs- og landbúnaðarráðherra sem hefur tengst Samherja á árum áður.  

Bjarni Benediktsson fjármálaráðherra sagði málið dapurlegt í alla staði.

„Bæði vísbendingar um mútugreiðslur. Skattundanskot,“ segir Bjarni. „Í þessu tiltekna máli koma bæði Máritíus og Kýpur við sögu og það vill þannig til að við höfum gengið frá samningum við þessi ríki sem tryggja okkur aðgang að upplýsingum og öðrum gögnum. Samvinnu ef á þarf að halda sem getur reynst mjög mikilvæg í svona tilvikum.“

Þú hefur sjálfur verið nefndur í sögunni í tengslum við aflandsviðskipti. Sýnir þetta ekki að það er ekki boðlegt að stunda viðskipti í aflandsfélögum til að losna undan eftirliti, sköttum og annað í sínu heimaríki?

„Ég ætla ekki að skrifa upp á það að ég hafi verið að gera neitt slíkt. Þar skilur á milli þeirra sem gera grein fyrir sínum hlutum og þeirra sem nota aflandsfélög til að skjóta sér undan sköttum. Að sjálfsögðu erum við að berjast gegn slíku með öllum tiltækum ráðum. Og þar sem við komumst á snoðir um það að menn séu að nýta sér skattaskjól, einhverjar flóknar fyrirtækjafléttur til að skjóta sér undan skattgreiðslum; þar ætlum við að elta menn, við ætlum að ákæra þá og vonast til að þeir verði dæmdir sekir fyrir slík brot,“ segir Bjarni Benediktsson.


Tengdar fréttir

Samherjamálið skref fyrir skref

Samherjaskjölin sem birt voru á vef WikiLeaks í gær, og voru til umfjöllunar í fréttaskýringaþættinum Kveik á RÚV í gærkvöldi og í dagblaðinu Stundinni, hafa vakið mikla athygli – og gríðarleg viðbrögð í íslensku samfélagi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.