Innlent

Guðmundar og Geirfinnsmálið: „Ríkið er nú komið í stríð við Hæstarétt“

Jóhann K. Jóhannsson og Samúel Karl Ólason skrifa
Ragnar Aðalsteinsson.
Ragnar Aðalsteinsson. Fréttablaðið/Stefán

Ragnar Aðalsteinsson, lögmaður Guðjóns Skarphéðinssonar, segir það hafa komið skjólstæðingi sínum á óvart að ríkisstjórnin skyldi hafa krafist sýknu af skaðabótakröfum Guðjóns vegna fangelsunar hans í Gerfinnsmálinu.

„Umbjóðandi minn og aðrir voru hafðir í fangelsi, gæsluvarðhaldi og síðan í afplánun árum saman. Síðan sýknar Hæstiréttur þá, þar sem það liggur ekki fyrir að þeir hafi gerst sekir um það sem er borið á þá og þá eiga þeir samkvæmt lögum og stjórnarskrá rétt á bótum,“ segir Ragnar.

Guðjón hefur krafist 1,3 milljarða í bætur eftir að Hæstiréttur sýknaði hann og aðra í málinu í fyrra. Bæturnar eru meðal annars vegna ólöglegrar frelsissviptingar og rangra dóma.

Greinargerð ríkisins í málinu var lögð fram í Héraðsdómi Reykjavíkur í gær þar sem sýknukrafan kemur fram og er þess einnig krafist að Guðjón borgi málskostnað.

Sjá einnig: Dómurinn frá 1980 hafi fullt sönnunargildi um málsatvik

Ragnar segir ríkisstjórnina hafa tekið þá afstöðu að reyna að koma í veg fyrir að þeir nái fram bótum með því að berjast upp á líf og dauða gegn réttindum þeirra fyrir dómstólum í ríkinu.

Getur verið að bótakrafan hafi verið óraunhæf?

„Hún er það að áliti ríkisins en bótakrafan styðst einungis við þann eina fordæmisdóm sem skiptir máli,“ segir Ragnar.

Þar vísaði Ragnar í dóm frá 1983 þar sem fjórir aðrir sem að málinu komu fengu bætur eftir að hafa setið saklausir í gæsluvarðhaldi.

„Ekki eins lengi að vísu. Það voru 105 dagar en ekki mörg ár,“ segir Ragnar. „Ég sem lögmaður komst ekki hjá því að benda skjólstæðingi mínum á fordæmið og hvað áttum við að miða við annað?“

Ragnar segist ekki hafa átt von á þessari niðurstöðu og sagðist hafa orðið þess var að ríkið gengi lengra í vörnum sínum gegn borgurum en aðrir aðilar í samfélaginu og svífist einskis.

„Ég hélt ekki að í þessu máli myndi ríkið ganga svo langt að krefjast sýknu og segja: „Þið eigið engan rétt á bótum. Þetta var allt ykkur að kenna. Þið beruð ábyrgð á þessu. Dómur Hæstaréttar í fyrra skiptir engu máli og við ætlum að rekja málið allt afturábak til 1974, 5 og sex og sanna sekt ykkar.“

„Það virðist vera það sem stefnt er að í þessu, þrátt fyrir sýknudóm Hæstaréttar. Ríkið er nú komið í stríð við Hæstarétt.“

Ragnar sagði ríkisstjórn ekki geta mismunað borgurum og því eigi hann von á að svipaðir dómar falli í öðrum kröfumálum.

Hann sagðist telja ríkið vera að reyna að tefja málið og reyna að koma í veg fyrir að „þetta fólk nái réttlæti innan sæmilegs tíma og er kannski að reyna að koma þessu langt inn í framtíðina og jafnvel í stjórnartíð næstu ríkisstjórnar. Þannig að þessi ríkisstjórn sé laus undan málinu.“

Ragnar sagðist sjá fram á langan málarekstur og það lægi fyrir þegar gagnaðili beiti öllum leiðum til að gera mál erfitt í stað þess að fara í kjarna þess.


Tengdar fréttir

Dómurinn frá 1980 hafi fullt sönnunargildi um málsatvik

Ríkið telur að byggja eigi á málsatvikum eins og þeim er lýst í sakfellingardómi Hæstaréttar frá 1980 um bótakröfu Guðjóns Skarphéðinssonar. Ný gögn sem aflað hefur verið gangi ekki framar þeim dómi. Fullyrðingum Guðjóns um ólöglegar rannsóknaraðgerðir hafnað sem ósönnuðum með öllu.

Stjórnvöld reyna enn að ná sátt um bætur

Af hálfu stjórnvalda hefur verið lögð áhersla á að ríkið væri tilbúið að semja um sanngjarnar bætur til þeirra sem sýknaðir voru og aðstandenda þeirra sem fallnir eru frá og afla til þess viðeigandi lagaheimildar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.