Innlent

Fjórir bílar skemmdust í Hæðargarði

Stefán Ó. Jónsson skrifar
Íbúi við götuna sem Vísir ræddi við segir mikinn viðbúnað í Hæðargarði þessa stundina en unnið er að því að hreinsa upp olíu og brak úr skemmdu bílunum.
Íbúi við götuna sem Vísir ræddi við segir mikinn viðbúnað í Hæðargarði þessa stundina en unnið er að því að hreinsa upp olíu og brak úr skemmdu bílunum. Vísir/Vilhelm
Slökkvilið og sjúkraflutningamenn voru kallaðir til vegna áreksturs á gatnamótum Hæðargarðs og Grensásvegar á ellefta tímanum í dag. Svo virðist vera sem ökumaður hafi misst stjórn á bíl sínum er hann ók norður eftir Grensásvegi með þeim afleiðingum að hann hafnaði á kyrrstæðum bílum á bílastæði í Hæðargarði. Fjórir bílar skemmdust; bíll ökumannsins og þrír bílar á stæðinu.

Ennþá er unnið á vettvangi en Guðmundur Guðjónsson, varðstjóri hjá slökkviliði höfuðborgarsvæðisins, gerir ráð fyrir að aðgerðum verði lokið upp úr klukkan 11. Þrífa þurfi upp brak úr bílunum og hreinsa upp olíu.

Frá vettvangi.Vísir/vilhelm
Hann segir einhverja hafa verið flutta á slysadeild eftir áreksturinn en hafði ekki nákvæman fjölda. Varðstjórinn gerir þó ekki ráð fyrir að alvarleg meiðsl hafi orðið á fólki, þó svo að það sé ekki hægt að útiloka fullkomlega.

Guðmundur tekur undir með blaðamanni að árekstur á þessum gatnamótum, sem eru ljósastýrð og umferðarhraði alla jafna ekki mikill, sé óvenjulegur. „En þetta getur alltaf komið fyrir,“ segir Guðmundur.




Fleiri fréttir

Sjá meira


×