Annað tap Al Arabi í röð

Strákarnir hans Heimis Hallgrímssonar í Al Arabi töpuðu fyrir Al Rayyan, 1-2, í katörsku úrvalsdeildinni í kvöld. Aron Einar Gunnarsson lék ekki með Al Arabi vegna meiðsla.

Þetta var annað tap Al Arabi í röð. Liðið er í 4. sæti deildarinnar með 13 stig, fimm stigum á eftir Al Rayyan sem er á toppnum.

Birkir Bjarnason lék allan leikinn fyrir Al Arabi sem komst yfir á 40. mínútu með marki Hamdis Harbaoui.

Tveimur mínútum síðar jafnaði Yacine Brahimi, fyrrverandi leikmaður Porto, fyrir Al Rayyan. Staðan var 1-1 í hálfleik.

Þegar stundarfjórðungur var til leiksloka skoraði argentínski landsliðsmaðurinn Gabriel Mercardo svo sigurmark gestanna.