Conte: Mourinho er smámenni

Orðastríð Antonio Conte, knattspyrnustjóra Chelsea, og Jose Mourinho, kollega hans í Manchester United, heldur áfram.

Síðastliðinn fimmtudag sakaði Conte Mourinho um að vera með Chelsea á heilanum, og sagði að hann þjáðist af „demenza senile.“

Enskan eitthvað að þvælast fyrir hinum ítalska Conte, sem var með þessu að gefa til kynna að minni Mourinho, þegar kæmi að hans eigin mistökum, væri á par við einstakling með elliglöp.

Mourinho var ekki par hrifinn af þeim orðum Conte og skaut all hressilega á ítalska stjórann á blaðamannafundi eftir 2-0 sigur United gegn Derby í enska bikarnum.

„Ég þarf ekki stjóra Chelsea til að segja mér til. Það sem ég mun hins vegar segja er að ég mun aldrei fara í bann fyrir það að hagræða úrslitum leikja,“ sagði Mourinho.

Conte fékk fjögurra mánaða bann tímabilið 2012-13 fyrir að tilkynna ekki hagræðingu úrslita leikja hjá hans gamla félagi, Siena. Conte var hins vegar hreinsaður af öllum ásökunum 2016.

Conte svaraði Mourinho í gær en hann eyddi meirihluta blaðamannafundar eftir markalaust jafntefli liðsins við Norwich, í það að tala um Mourinho.

Conte, sem fór ekki í felur með það hversu reiður hann var, kallaði Mourinho smámenni og efaðist um heillindi hans.

„Mourinho sýndi með þessum orðum sínum að hann er smámenni. Hann var smámenni fyrir mörgum árum síðan, hann er smámenni núna, og hann mun án efa vera smámenni um komandi tíð,“ sagði Conte.

„Þetta er ekki í fyrsta skipti sem hann sýnir hið sanna eðli sitt. Hann gerði grín af enskukunnáttu Claudio Ranieri, en mætti síðan í Ranieri bol honum til heiðurs á blaðamannafund þegar að Ranieri missti starfið sitt hjá Leicester. Þetta er gott dæmi um það hversu „fake“ Mourinho er,“ sagði Conte.

Conte sagðist að lokum hlakka til þess að mæta Mourinho næst. Liðin mætast á Old Trafford þann 25. febrúar næstkomandi.

„Aðstæðurnar eru mjög skýrar. Ég hef ekkert að afsaka og þarf ekki að útskýra orð mín frekar. Þegar við förum á Old Trafford munum við mætast. Ég er tilbúinn en veit ekki hvort hann er það. “