WBA missti af mikilvægum sigri

West Bromwich Albion missti af mikilvægum stigum í fallbaráttunni í ensku úrvalsdeildinni þegar liðið gerði jafntefli við Swansea eftir að hafa leitt leikinn.

Alan Pardew var rekinn úr starfi knattspyrnustjóra WBA í vikunni og mætti liðið því stjóralaust til leiks þegar Swansea kom í heimsókn á The Hawthorns.

Eftir markalausan fyrri hálfleik komust heimamenn í forystu með marki frá Jay Rodriguez á 54. mínútu. Eitt mikilvægasta mark Rodriguez á tímabilinu en WBA þurfti nauðsynlega á sigri að halda.

Varnarmenn WBA virtust hins vegar gleyma því að þeir væru að berjast fyrir lífi sínu í deildinni þegar þeir skildu Tammy Abraham eftir aleinan í teignum í hornspyrnu þar sem hann gat skallað boltann í netið af tveggja metra færi.

Joshua King bjargaði stigi fyrir Borunemouth gegn Crystal Palace. Hann skoraði annað mark Bournemouth og jafnaði metin í 2-2 eftir aukaspyrnu.

Palace komst í forystu á 47. mínútu með marki frá Luka Milivojevic beint úr aukaspyrnu. Lys Mousset jafnaði metin áður en Wilfried Zaha kom Palace aftur yfir með glæsilegu marki fyrir utan teiginn.

Úrslitin þýða að enn munar tíu stigum á WBA í botnsætinu og Palace í því 17., síðasta örugga sætinu í deildinni.

Aðeins einu stigi ofar situr Huddersfield sem gerði jafntefli við Brighton í nýliðaslag á suðurströndinni.

Bæði lið þurftu þrjú stig í baráttunni um að halda sæti sínu í deild hinna bestu. Heimamenn í Brighton komust yfir á 29. mínútu þegar Jonas Lössl skoraði sjálfsmark í marki Huddersfield. Það tók Huddersfield þó aðeins fjórar mínútur að svara þegar Steve Mounie nýtti sér mistök Shane Duffy í vörninni.

Davy Propper fékk að líta rauða spjaldið á 74. mínútu eftir slæma tæklingu á Jonathan Hogg. Það kom þó ekki að sök, Brighton náði að halda leikinn út og skiptu liðin með sér stigunum.

Newcastle fór langt með að tryggja sitt sæti í deildinni með sigri á Leicester á útivelli.

Jonjo Shelvey kom Newcastle yfir snemma leiks og Ayoze Perez tvöfaldaði forystuna um miðjan seinni hálfleik. Jamie Vardy skoraði sárabótamark fyrir Leicester undir lok leiksins en Newcastle fór með 2-1 sigur.