Stóri Sam hvílir Gylfa á móti stóru liðunum en ætti að skoða tölfræðina betur

Sam Allardyce, knattspyrnustjóri Everton, hefur greinilega ekki kynnt sér nógu vel tölfræði íslenska landsliðsmannsins Gylfa Þórs Sigurðssonar en okkar maður er sjaldan öflugri en í leikjum á móti stóru liðunum í enska boltanum.

Stóri Sam hvíldi Gylfa um helgina þegar Everton tapaði 5-1 á móti Arsenal. Þetta er annar leikurinn á stuttum tíma hjá Everton liðinu á móti einu af stóru liðum deildarinnar þar sem Gylfi fær ekkert að spila.

Gylfi var heldur ekkert með Everton í 2-0 tapi á móti Manchester United á nýársdag. Þetta eru einu tveir deildarleikirnir sem Gylfa hefur misst af síðan að Sam Allardyce tók við liðinu.

Markatalan í þeim er -6 eða 1-7 sem ættu nú að gefa stjóranum einhver skilaboð þegar kemur að afleiðingunum að hvíla íslenska landsliðsmanninn sem stóð sig vel í 2-1 sigri á Leicester í leiknum á undan.

 

Gylfi hefur skorað 4 mörk og gefið 3 stoðsendingar á móti Chelsea á síðustu árum, hann er með 4 mörk og 1 stoðsendingu á móti Liverpool, hefur skorað 3 mörk og gefið 3 stoðsendingar í leikjum á móti Manchester United, er með 3 mörk og 1 stoðsendingu á móti Manchester City og þá hefur Gylfi boðið upp á 2 mörk og 2 stoðsendingar í leikjum á móti Arsenal.

Það er helst að okkar maður hafi verið í vandræðum á móti sínum gömlu félögum í Tottenham en Gylfi er samt með 2 mörk í 8 leikjum á móti Spurs.

Næsti leikur Everton á móti einu af stóru liðum deildarinnar er leikur á móti Manchester City en hann fer ekki fram fyrr en í loka mars.

Þangað til mun Everton spila við liðin á hinum enda vallarins og þar er mikilvægt fyrir liðið að safna stigum.