Ungur sonur leiðtoga ISIS féll fyrir hendi Rússa

Ungur sonur leiðtoga hryðjuverkasamtakanna, sem kenna sig við íslamskt ríki, er látinn.

Fréttaveitur ISIS staðfestu í dag að Huthaifa al Badri, sonur Abu Bakars al Baghdadi, hefði fallið í átökum við Rússa og sýrlenska stjórnarherinn í Homs héraði í Sýrlandi.

Ekki er vitað hvað drengurinn var gamall en af myndum af dæma var hann vart kominn á unglingsár. Þrátt fyrir það hafði hann hlotið herþjálfun og var að sögn hluti af sérsveit.

Vígasveitir ISIS hafa verið hraktar frá nær öllum svæðum sem samtökin stjórnuðu en stunda áfram skæruhernað í Sýrlandi og Írak.

Leiðtogi þeirra, Abu Bakar al Baghdadi, hefur ítrekað verið talinn af. Nýjustu fregnir herma að hann sé særður en á lífi. Eiginkona hans og dóttir voru teknar höndum í Líbanon fyrir nokkrum árum.