Banna sjálfsmyndatöku vegna tíðra og mannskæðra slysa

Yfirvöld í indverska ríkinu Góa hafa bannað sjálfsmyndatöku á 24 afmörkuðum svæðum við ströndina vegna tíðra og mannskæðra slysa.

Hvergi í heiminum verða fleiri sér að voða við þá iðju að mynda sjálfan sig en á Indlandi. Samkvæmt alþjóðlegri rannsókn voru 127 skráð tilfelli þar sem fólk féll frá fyrir aldur fram vegna sjálfsmyndatöku frá 2014 til 2015. Þar af voru 76 á Indlandi eða tæp 60% allra tilfella.

Fyrir rúmri viku dóu tveir ferðamenn sem voru að reyna að ná fullkominni ljósmynd af sér á stórum klettum í Góa, þar sem mikill brimgarður var fyrir neðan. Alda sópaði þeim út á haf og var það ekki í fyrsta sinn á þessum sama stað.

Góa tekur á móti meira en sex milljón ferðamönnum á hverju ári. Yfirvöld eru nú byrjuð að merkja sérstaklega hættulega staði þar sem bannað er að taka sjálfur.

Talsmaður fyrirtækis, sem sinnir björgunarstörfum í Góa, segir ekki seinna vænna að hringja öllum viðvörunarbjöllum vegna þess mikla manntjóns sem sjálfur hafi valdið.