John Terry kveður Aston Villa

John Terry og Birkir Bjarnason verða ekki samherjar á næsta tímabili en Terry yfirgaf Aston Villa í dag. Samningur hans við félagið rennur út í sumar.

Terry kom til Villa frá Chelsea síðasta sumar á eins árs samningi. Hann hafði ýjað að því að hann myndi framlengja samning sinn við Villa færi liðið upp í ensku úrvalsdeildina. Villa tapaði hins vegar úrslitaleiknum um laust sæti fyrir Fulham síðasta laugardag.

„Í dag kveð ég Aston Villa. Ég er mjög stoltur af því að hafa fengið tækifæri til þess að spila fyrir og vera fyrirliði þessa stóra félags. Ég hef lagt mig allan fram í vetur innan og utan vallar og enn þann dag í dag er ég sár yfir því að við komumst ekki upp í úrvalsdeildina þar sem þetta lið á heima,“ sagði Terry á Instagram síðu sinni í dag.

Líklegt þykir að Terry leiti til Kína eða Bandaríkjanna líkt og svo margir gera undir lok ferilsins.