Vináttuleikur við Frakka í október

Íslenska karlalandsliðið í knattspyrnu mun spila við franska landsliðið í vináttuleik í október en leikið verður í Frakklandi.

Þetta verður í þrettánda skiptið sem liðin mætast en níu sinnum hafa Frakkar unnið. Þrisvar hafa liðin gert jafntefli og er frægt jafntefli liðanna á Laugardalsvelli.

Síðasti leikur liðanna fór fram á EM í Frakklandi er Frakkar skelltu Íslandi, 5-2, í 8-liða úrslitum keppninnar. Nú fá okkar menn tækifæri til að hefna ófaranna.

Leikurinn er liður í undirbúningi íslenska liðsins fyrir Þjóðdeildina sem hefst í október en Ísland spilar við Sviss þann 15. október.