Færð enga hjálparkúta í djúpu lauginni

Fótbolti Íslenska kvennalandsliðið var fimm mínútum frá því að ná í gott jafntefli gegn  Japan á Algarve-mótinu en þurfti að sætta sig við svekkjandi 1-2 tap. Stelpurnar okkar náðu að jafna metin korteri fyrir leikslok og var jafnræði með liðunum þegar Japan komst aftur yfir með skallamarki stuttu fyrir leikslok eftir slakan varnarleik hjá íslenska liðinu.

Vantaði hugrekki framan af

Freyr Alexandersson, þjálfari íslenska liðsins, gerði tíu breytingar á byrjunarliðinu fyrir leikinn. Vildi hann gefa yngri leikmönnum tækifæri til að ýta við eldri leikmönnum og auka breiddina. Honum fannst vanta kjark í spilamennsku liðsins í fyrri hálfleik þegar Fréttablaðið heyrði í honum í gær.

„Við gerðum tíu breytingar til að dreifa álaginu en líka til að gefa nýjum leikmönnum tækifæri. Eitt af markmiðum okkar er að gefa tækifæri og auka breiddina en á sama tíma skapa samkeppni um byrjunarliðssætin. Til þess að sanna þig á efsta stigi verður þú að fá tækifæri og vera óhrædd. Í fyrri hálfleik fannst mér vanta hugrekki og frumkvæði hjá stelpunum. Það virtist vera smá sviðsskrekkur í þeim.“

Færð enga kúta á þessu stigi

Freyr vonast til þess að yngri leikmenn liðsins nýti sér reynsluna sem fæst af því að spila gegn bestu liðum heims þótt þetta sé aðeins æfingamót. Stærri verkefni bíði handan hornsins.

„Leikmenn mega gera mistök hér en lykillinn er hvort þú lærir af þeim, á þessu stigi er þetta bara eins og að hoppa út í djúpu laugina. Þú verður að geta synt og færð enga kúta til að bjarga þér. Eftir þetta verða þær að verða tilbúnari þegar komið er að keppnisleikjum,“ sagði Freyr sem var ekki ánægður með varnarleikinn í báðum mörkunum.

„Það eru mistök alls staðar á vellinum í fyrsta markinu, það var lélegur varnarleikur frá fremsta manni alveg aftur til Guðbjargar í markinu. Svo í seinna markinu er þetta bara klaufagangur hjá okkur, við getum ekki leyft okkur að klúðra svona hlut gegn jafn sterkum mótherja,“ sagði Freyr svekktur.

Þorðum loksins að líta upp

Íslenska liðið náði betri tökum á leiknum í seinni hálfleik. Hann sagði leikmennina loksins hafa farið eftir fyrirmælum sem gefin voru fyrir leik.

„Við áttum að gera betur í fyrri hálfleik en það var allt annað að sjá til okkar í seinni. Við fórum að gera það sem við lögðum upp með fyrir leik, loka á miðjuna og reyna að ýta þeim út á kantana. Fara í návígi af krafti en ekki af hálfum hug. Sóknarlega fórum við að líta upp og reyna að finna plássið í staðinn fyrir að hreinsa blint upp völlinn. Eftir að við jöfnum metin finnst mér leikurinn jafn þar til þær skora þetta mark sem reyndist sigurmarkið.“