Tapaði óvænt á móti Íslandi í október og var rekin í mars

Þýska knattspyrnusambandið rak í dag þjálfara þýska kvennalandsliðsins en Steffi Jones fékk aðeins tæp tvö ár í starfinu. Tap á móti Íslandi átti þátt í endalokum hennar.  

Brottrekstur Steffi Jones kemur aðeins sex sögum eftir SheBelieves æfingamótið í Bandaríkjunum þar sem þýska liðið vann ekki leik og olli miklum vonbrigðum. Liðið tapaði 1-0 á móti bandaríska liðinu og 3-0 á móti því franska en gerði síðan 2-2 jafntefli við England.  

Áður hafði þýska liðið dottið út fyrir Dönum í átta liða úrslitum Evrópumótsins síðasta sumar eftir að hafa unnið sex Evrópumót þar á undan.

Eitt af stærstu áföllunum var þó örugglega 3-2 tap liðsins á heimavelli á móti íslenska landsliðinu í október. Þýska liðið hafði fyrir leikinn unnið 37 heimaleiki í röð í undankeppni HM eða EM og þetta var fyrsta tap liðsins í undankeppni stórmóts í tuttugu ár.

Der Deutsche Fußball-Bund hat Bundestrainerin Steffi Jones mit sofortiger Wirkung von ihren Aufgaben entbunden  https://t.co/cUeWEK3HE7

— DFB-Frauenfußball (@DFB_Frauen) March 13, 2018

Hrost Hrubesch tekur við þýska landsliðinu tímabundið en framundan er barátta við Ísland og Tékkland um fyrsta sætið í riðlinum og þar með sæti á HM í Frakklandi 2019.

Næstu leikir þýska landsliðsins í undankeppninni eru á móti Tékklandi og Slóveníu í apríl en íslenska landsliðið mætir Slóveníu og Færeyjum í sama landsleikjahléi.

Steffi Jones tók við þýska landsliðinu af Silviu Neid eftir Ólympíuleikana í Ríó 2016 þar sem að þýska landsliðið vann gull. Þýsku stelpurnar unnu alls fern gullverðlaun á ellefu árum undir stjórn Silviu Neid.

Steffi #Jones ist die Aufgabe als Trainerin mit großem Engagement und Einsatz angegangen, dafür möchte ich ihr im Namen des gesamten Präsidiums sehr herzlich danken. Viel Erfolg, lieber Horst, für die nächsten Spiele mit den @DFB_Frauen!

— Reinhard Grindel (@DFB_Praesident) March 13, 2018

Þýska liðið lék 22 leiki undir stjórn Steffi Jones, vann þrettán þeirra og tapaði fimm. Liðið var með 59,1 prósent árangur undir stjórn hennar en 73,9 prósent árangur undir stjórn Silviu Neid.