Ungir Englendingar vinna allt en fá samt ekki séns í úrvalsdeildinni

Lítill spiltími enskra leikmanna er vaxandi vandamál í ensku úrvalsdeildinni og þá sérstaklega hjá ungum enskum leikmönnum sem fá ekki mörg tækifæri, sérstaklega hjá stórliðunum.

Ensku unglingalandsliðin hafa verið að vinna stórmót reglulega undanfarin ár og þá var enski hópurinn á HM sem komst alla leið í undanúrslit mótsins sá yngsti á mótinu.

Þrátt fyrir þetta hefur mínútum enskra leikmanna lítið sem ekkert fjölgað við upphaf nýrrar leiktíðar í ensku úrvalsdeildinni. Enskir leikmenn hafa aðeins fengið 19,6 prósent mínútna efstu sex liðanna í deildinni og í heildina ná ensku leikmennirnir bara tæpum þriðjungi spilaðra mínútna í sinni eigin deild.

Þessari tölfræði var velt upp í myndveri BT Sport á Vicarage Road eftir leik Watford og Manchester United en þar voru sérfræðingarnir Rio Ferdinand, Tom Cleverley og Martin Keown spurði hvað þessir leikmenn þurfi hreinlega að gera til þess að fá mínútur.

„Knattspyrnustjórarnir í deildinni eru ekki að stýra enska landsliðinu. Þeir hafa ekki áhyggjur af enska liðinu,“ segir Rio Ferdinand og var þá spurður hvort ensku leikmennirnir væru hreinlega ekki nógu góðir?

„Augljóslega ekki. Ef þessir ungu strákar eins og Phil Foden (Man. City), Ruben Loftus-Cheek (Chelsea) og Dominik Solanke (Liverpool) væru nógu góðir þá væru þeir að spila reglulega. Starf knattspyrnustjórans hangir alltaf á bláþræði og því vilja þeir leikmenn sem vinna leiki strax. Þess vegna fá þessir ungu menn ekki tækifæri,“ segir Ferdinand.

Landsliðsmiðvörðurinn fyrrverandi mælir með því að þessir strákir sparki upp hurðinni hjá knattspyrnustjórunum og heimti að fara á lán.

„Paul Pogba vissi hversu góður hann var og sagðist vilja fara. Hann hafði ekki þolinmæði fyrir að bíða eftir að honum yrði ýtt inn í liðið á þeirra hraða þannig að hann fór og kom aftur inn um hina hurðina,“ segir Ferdinand.

„Phil Foden fær ekki mikið að spila. Hann verður að fara eitthvað og spila. Sjáið bara hvernig Jadon Sancho gengur hjá Dortmund. Hann er að spila frábærlega í þýsku deildinni. Þessir strákar verða að komast í lið þar sem að þeir fá að spila annars staðna þeir bara,“ segir Rio Ferdinand.

Alla umræðuna má sjá hér að neðan.