Tíu mörk í síðustu tíu leikjum hjá Alberti

Albert Guðmundsson var á skotskónum þegar Jong PSV vann 3-1 sigur á Jong Ajax í hollensku B-deildinni í dag.

Albert og félagar lentu undir á 12. mínútu en 12 mínútum síðar var staðan orðin jöfn. Á 28. mínútu skoraði Albert svo og kom Jong PSV yfir.

Hann var svo aftur á ferðinni á 61. mínútu þegar skot hans fór af varnarmanni Jong Ajax og inn. Markið var skráð sem sjálfsmark.

Albert hefur nú skorað 10 mörk í síðustu 10 leikjum Jong PSV. Hann hefur alls skorað 14 mörk í hollensku B-deildinni á tímabilinu.