Ensku strákarnir komnir í undanúrslit

Enska landsliðið skipað leikmönnum 21 árs og yngri tryggði sér í kvöld sæti í undanúrslitum á EM í Póllandi með 3-0 sigri á heimamönnum.

Enska liðið fékk sjö stig í A-riðlinum og vann hann. Ekki liggur fyrir hverjum Englendingar mæta í undanúrslitunum.

Demarai Gray, leikmaður Leicester City, kom Englandi yfir strax á 6. mínútu.

Jacob Murphy kom Englendingum í 2-0 á 69. mínútu og átta mínútum fyrir leikslok skoraði Lewis Baker þriðja markið úr vítaspyrnu og gulltryggði enskan sigur.

England hefur tvisvar sinnum orðið Evrópumeistari í þessum aldursflokki (1982 og 1984).