Þynnka eykur hættuna á misnotkun

Þeir sem hafa tilhneigingu til að fá slæma timburmenn eins og til dæmis höfuðverk, þreytu, ógleði og uppköst eru í meiri hættu á að misnota áfengi en aðrir þegar til lengri tíma er litið. Þetta er niðurstaða könnunar dönsku lýðheilsustofnunarinnar sem byggir á úttekt á alþjóðlegum rannsóknum.

Danska fréttaveitan Ritzau hefur það eftir prófessornum Janne Tol­strup að ekki sé vitað hvers vegna sumir fá mikla timburmenn en aðrir sem drukkið hafa jafn mikið sleppi. Hún bendir á að ekkert bendi til að slæm þynnka komi í veg fyrir frekari drykkju. Til dæmis drekki þeir sem fá slæma timburmenn áfengi daginn eftir í því skyni að draga úr óþægindunum.