Engin lóðagjöld til að auðvelda fólki að byggja sér hús

Milli þrjátíu og fjörutíu nýjar íbúðir eru nú í smíðum eða undirbúningi á Höfn í Hornafirði. Slík gróska í húsbyggingum hefur ekki sést þar í tuttugu ár. Rætt var við Björn Inga Jónsson bæjarstjóra í fréttum Stöðvar 2.



Bæjarstjóri þeirra Hornfirðinga, Björn Ingi Jónsson, sýnir okkur hvar sveitarfélagið er lagt af stað með smíði lítils tveggja hæða fjölbylishúss. Á næstu lóð er svo að hafin smíði á öðru samskonar húsi sem útgerðarfyrirtækið Skinney Þinganes stendur fyrir.

 

Í öðru hverfi má sjá grunn að einbýlishúsi en einstaklingar eru einnig farnir að byggja sér hús á Hornafirði. Sveitarfélagið gerir sitt til að auðvelda mönnum íbúðabyggingar, en lóðagjöld voru felld niður hjá einstaklingum, að sögn bæjarstjórans. Þannig fóru 10-14 lóðir.

 

Flestum lausum byggingarlóðum hefur nú verið úthlutað og er sveitarstjórnin nú farin að huga að því hvar næsta íbûðahverfi verði skipulagt. Bæjarstjórinn segir svo mikla grósku í íbúðabyggingum ekki hafa verið í 20-25 ár og sér fram á að á að næstu fimm árum gæti byggst upp á þrjátíu til fjörutíu lóðum. 

 

Nánar í frétt Stöðvar 2.