Sneijder búinn að finna sér nýtt lið

Wesley Sneijder, leikjahæsti leikmaður hollenska landsliðsins frá upphafi, er genginn í raðir franska úrvalsdeildarliðsins Nice frá Galatasary í Tyrklandi.

Sneijder, sem er 33 ára, lék í fjögur ár með Galatasary og varð tvívegis tyrkneskur meistari með liðinu.

Sneijder hefur einnig leikið með Ajax, Real Madrid og Inter þar sem hann átti sitt besta tímabil (2009-10). Hann hjálpaði þá ítalska liðinu að vinna þrefalt; deild, bikar og Meistaradeild Evrópu.

Nice kom mjög á óvart í frönsku úrvalsdeildinni á síðasta tímabili. Liðið var lengst af í toppbaráttu en endaði að lokum í 3. sæti.

Það gaf Nice sæti í umspili um sæti í riðlakeppni Meistaradeildarinnar. Þar mætir franska liðið Napoli.

Sneijder hefur leikið 131 landsleik fyrir Holland og skorað 31 mark. Hann var í hollenska liðinu sem vann silfur á HM 2010 og brons á HM fjórum árum síðar.