Ingvar Smári er nýr formaður SUS

Ingvar Smári Birgisson er nýr formaður Sambands ungra sjálfstæðismanna. Hann bar sigur úr býtum gegn Ísaki Einari Rúnarssyni í kosningu sem fram fór á Sambandsþingi SUS á Eskifirði um helgina. Ingvar fékk 222 atkvæði og Ísak fékk 210. Sex atkvæði voru auð eða ógild.

Umtalsverðir lögheimilisflutningar hafa verið undanfarið eins og Vísir hefur fjallað um. Borið hefur á því að stuðningsmenn beggja formannsefna hafi flutt lögheimili sín til Reykjavíkur til að reyna að tryggja sér sæti á þinginu sem fulltrúi Heimdalls.

Sjá einnig: Menntskælingum við Sund boðið í djammferð hringinn í kringum landið.

Eftirfarandi kom fram í framboðstilkynningu Ingvars fyrr á árinu:

Ingvar er á 24 ára gamall og uppalinn í Reykjavík. Hann starfar hjá Nordik lögfræðiþjónustu en hann lauk BA gráðu í lögfræði frá Háskóla Íslands árið 2016 og stundar nú meistaranám í lögfræði við sama skóla. Hann lauk stúdentsprófi af fornmálabraut Menntaskólans í Reykjavík árið 2013. Ingvar starfaði áður sem blaðamaður á Morgunblaðinu.

Ingvar hefur setið í stjórn SUS frá árinu 2013 og verið afar virkur í starfi Sjálfstæðisflokksins um árabil. Þá gegndi hann formennsku í Heimdalli, félagi ungra Sjálfstæðismanna í Reykjavík, árin 2013 til 2015 en Heimdallur er stærsta aðildarfélag SUS. Ingvar hefur einnig verið virkur í starfi alþjóðasamtakanna Students For Liberty og skipulagt fjölmargar alþjóðlegar ráðstefnur á þeirra vegum.