Forlagið skal enn lúta skilyrðum Samkeppniseftirlitsins

Samkeppniseftirlitið birtir í dag ákvörðun sína sem snýr að beiðni bókaútgáfunnar Forlagsins ehf. um endurupptöku ákvörðunar eftirlitsins er varðar samruna JPV útgáfu ehf. og Vegamóta ehf. árið 2008.

Laut beiðni Forlagsins nú að því að skilyrði vegna samrunans verði felld úr gildi eða dregið úr þeim en niðurstaða Samkeppniseftirlitsins er að Forlagið sé enn í markaðsráðandi stöðu á bókamarkaði. Því sé nauðsynlegt að skilyrðin gildi áfram að því er fram kemur í tilkynningu frá Samkeppniseftirlitinu.



Sjá einnig:Forlagið sagt í stöðu til að beita hefndaraðgerðum

Í tilkynningunni segir að Forlagið hafi mótmælt skilgreiningu markaðarins í málinu og mati á hlutdeild félagsins á markaðnum. Þá taldi fyrirtækið einnig að ákvörðun Samkeppniseftirlitsins vegna samruna JPV og Vegamóta árið 2008 hefði byggt á röngum forsendum, aðstæður hefðu breyst auk þess sem skilyrðin væru íþyngjandi fyrir rekstur félagsins.



Sjá einnig:Segir Samkeppniseftirlitið leggja Forlagið í einelti

„Athugun Samkeppniseftirlitsins á bókamarkaðnum núna sýnir að staða Forlagsins hefur ekki breyst í meginatriðum á liðnum árum. Forlagið er enn stærsta bókaútgáfan á Íslandi með 45-50% hlutdeild í almennri bókaútgáfu og er með u.þ.b. fjórfalt meiri hlutdeild en sá útgefandi sem næst kemur að stærð sem er Bjartur-Veröld. Þá er Forlagið með mikla breidd í útgáfu samanborið við flesta aðra bókaútgefendur. Er það því niðurstaðan í ákvörðun eftirlitsins að Forlagið sé ennþá í markaðsráðandi stöðu á bókamarkaði.

 

Samkeppniseftirlitið telur því mikilvægt að skilyrðin, sem Forlagið óskar nú eftir að verði felld niður, og snúast aðallega um að Forlagið beiti ekki styrk sínum gagnvart keppinautum og skaði þannig samkeppni, gildi áfram. Skiptir líka máli að meirihluti keppinauta sem tók þátt í könnun eftirlitsins telja að skilyrðin hafi stuðlað að aukinni samkeppni og að ekki séu forsendur til að fella þau úr gildi að hluta til eða öllu leyti. Þá telur eftirlitið að Forlagið hafi ekki rökstutt hvernig skilyrðin setji félaginu í raun skorður og hvaða áhrif það hafi fyrir það og aðra ef þau yrðu felld niður,“ segir í tilkynningu Samkeppniseftirlitsins þar sem skilyrðin sem Forlagið skal áfram lúta eru einnig rakin.

Þau felast meðal annars í eftirfarandi:

•         Forlagið má aðeins semja um útgáfurétt á einum bókartitli hverju sinni við hvern rithöfund.

•         Forlaginu er óheimilt að veita endurseljendum bóka afslátt frá heildsöluverði bóka sinna nema Forlagið geti með óyggjandi hætti sýnt fram á kostnaðarlegt hagræði af viðskiptum við viðkomandi endurseljanda sem sé í samræmi við afsláttinn.

•         Forlaginu er óheimilt að mismuna endurseljendum bóka í hvers kyns kynningarstarfi, auglýsingaherferðum, eða með efni sem snýr að uppstillingu og auglýsingu bóka í verslunum endurseljenda nema slík mismunun byggist á almennum viðskiptalegum sjónarmiðum.

•         Forlaginu er óheimilt að gera hvers kyns einkakaupasamninga við endurseljendur bóka.

•         Forlaginu er óheimilt að hafa nokkur afskipti af söluverði endurseljenda þeirra bóka sem félagið gefur út eða birta með nokkru móti söluverð endurseljenda.