Húsleit hafnað og stefnt á að stefna bæjarfélaginu fyrir dómstóla

Hjónin Einar Bogi Sigurðsson og Kristján Ingi Jónsson undirbúa nú mál gegn Mosfellsbæ vegna aðgerða bæjarins til að losna við hænsn af bæ þeirra, Suður-Reykjum.

Hæstiréttur staðfesti í gær niðurstöðu Héraðsdóms Reykjavíkur um að synja um húsleit á heimili þeirra og að þeim verði gert að afhenda „óskráðar hænur“ og „óleyfishana“ sem þeir halda. Ekki var uppi rökstuddur grunur um brot af hálfu hjónanna og beiðninni því synjað.

„Ég er eins og fiðrildi hérna og veit ekki alveg hvernig ég á að haga mér. Nú förum við að sækja á bæinn,“ segir Einar Bogi.

Deilan er áralöng og hefur Úrskurðarnefnd um umhverfis- og auðlindamál meðal annars komist að þeirri niðurstöðu að fiðurféð skuli burt. Einar og Kristján saka hins vegar bæinn um að hafa breytt lóðaskráningu til að koma þeim af lögbýlaskrá. Þeir búa á Suður-Reykjum 3 en bærinn segir þá búa á Reykjarhvoli 5.

„Þeir breyttu lóðarnúmerinu án okkar vitundar til að losna við fuglana. Þetta eru bara hreinir og klárir eineltistilburðir,“ segir Einar. „Ég veit það fyrir víst að næstu skref verða eitthvað á þá leið að við krefjumst þess að bærinn bakfæri það sem hefur verið gert og þessi mistök verði leiðrétt.“