Fanndís til Marseille

Fanndís Friðriksdóttir er gengin í raðir Olympique de Marseille og skrifar hún þar undir eins árs samning.

Þetta staðfesti Fanndís í samtali við Fótbolta.net, en hún fór til Frakklands á dögunum þar sem hún skoðaði aðstæður hjá franska liðinu. Nú er hún búin að skrifa undir samning.

Marseille endaði í fjórða sæti á síðustu leiktíð, en flautað verður til leiks í frönsku úrvalsdeildinni í dag þegar Marseille mætir Guingamp.

Fanndís hefur verið einn allra besti leikmaður Pepsi-deildarinnar undanfarin ár, en hún hefur einu sinni áður leikið í atvinnumennsku. Þá lék hún í Noregi tímabilið 2013-2014 með Kolbotn.