Miðverðirnir úr Víkinni báðir í sigurliði

Gömu liðsfélagarnir úr Víkingi R., Djurgården og íslenska landsliðinu, Sölvi Geir Ottesen og Kári Árnason, voru báðir í sigurliði í dag.

Sölvi byrjaði sinn fyrsta leik fyrir Guangzhou R&F í kínversku ofurdeildinni og var aðeins 10 mínútur að skora sitt fyrsta mark fyrir félagið.

Guangzhou byrjaði leikinn af fítonskrafti og eftir 28 mínútur var staðan orðin 3-0. Sölvi og félagar unnu á endanum 4-1 sigur. Þetta var þriðji sigur Guangzhou í röð en liðið er í 5. sæti deildarinnar.

Kári var í byrjunarliði Aberdeen sem vann 2-0 sigur á Hamilton í 1. umferð skosku úrvalsdeildarinnar.

Kári var tekinn af velli eftir klukkutíma. Þá var staðan 1-0, Aberdeen í vil.

Þetta var fyrsti leikur Kára fyrir Aberdeen í fimm ár. Hann lék áður með skoska liðinu tímabilið 2011-12.