Ronaldo snýr aftur á móti United

Cristiano Ronaldo, leikmaður Real Madrid á Spáni og portúgalska landsliðsins, hefur verið valinn í leikmannahóp Real Madrid fyrir leikinn um UEFA Ofurbikarinn gegn Manchester United sem fer fram í Skopje í Makedóníu á þriðjudag.

Portúgalinn snjalli hefur ekki verið með Real Madrid á undirbúningstímabilinu en hann hafði fengið lengra sumarfrí vegna álags, en hann var í sigurliði Portúgala í Álfubikarnum nú í sumar.

Gaman verður að sjá Ronaldo snúa aftur eftir fríið, í leik á móti sínu gamla liði en Cristiano Ronaldo lék með Manchester United frá árinu 2003 til ársins 2009.

Talið var að Ronaldo myndi ekki leika með Real Madrid í leiknum en hann sneri til æfinga aðeins í síðustu viku.

Ronaldo sem er orðinn 32 ára gamall, hefur verið einn besti leikmaður heims síðustu ár. Hann hefur leikið 265 leiki fyrir Real Madrid og skorað í þeim 285 mörk.

Spurningar hafa vaknað um framtíð Portúgalans, en hann er sagður vilja snúa aftur til Englands eftir að hafa lent í veseni við skattayfirvöld á Spáni.