Frábiðja sér gullfiska og greiðslukort í rotþróm

„Aðallega er þetta nú þessar blautþurrkur og annað sem slitnar ekki. Þetta fer inn í legur á öllum tækjum sem verið er að nota við að vinna seyruna,“ segir Valtýr Valtýsson, sveitarstjóri Bláskógabyggðar.

Umhverfis- og tæknisvið Uppsveita, sem Bláskógabyggð á aðild að, sendi fyrir fáeinum dögum húseigendum í sveitarfélögum í uppsveitum Suðurlands bréf þar sem skorað er á húseigendur að passa vel rotþrær sínar. Vakin er athygli á að rotþrær séu ekki fyrir sorp eins og blautþurrkur. Þar er jafnframt tekið fram að ekki megi henda tannþræði, lyfjum, smokkum, dömubindum, tyggjói, hári, bleyjum, gullfiskum, kreditkortum, leikföngum, eða öðru rusli í klósettið.

„Hjá okkur er verið að vinna seyruna og taka hana til að nota við uppgræðslu. Þessir hlutir eru ekki að gera tækninni auðvelt fyrir við að vinna seyruna,“ segir Valtýr.

Í bæklingnum segir að aðeins náist að hreinsa hluta af þessu rusli frá seyrunni og því fari hluti af ruslinu alla leið í gegn. „Vegna þessa má líkja því að henda sorpi í klósettið við það að henda því á víðavangi.“

Seyra hefur verið nýtt til landgræðslu um nokkurt skeið. Árið 2012 gerðu Hrunamannahreppur og Landgræðsla ríkisins með sér samning um þriggja ára tilraunaverkefni með notkun á seyru til uppgræðslu. Tilraunaverkefnið var framkvæmt innan landgræðslugirðingar fremst á Hrunamannaafrétti, þangað sem seyran var flutt og felld niður með sérstökum búnaði. Verkefnið stóð í þrjú ár og var unnið með samþykki Heilbrigðiseftirlits Suðurlands.

Í úttekt Landgræðslunnar á verkefninu segir að vel hafi verið fylgst með framvindu og árangri uppgræðslunnar og mælingar gerðar á gróðri haustið 2015. „Strax á fyrsta ári mátti sjá að gróðurþekja jókst þar sem seyru var dreift. Tilraunin sýndi að seyra er góður kostur við uppgræðslu lands og nýting hennar til landbóta sé hyggilegur kostur. Urðun á seyru er í þessu samhengi, sóun á verðmætum,“ segir í skýrslu um úttektina.

Allt frá því að þessi úttekt var gerð hefur Landgræðslan, í samvinnu við sveitarfélög, haldið áfram að nýta seyru við landgræðslu.