Eiður Smári ekki hættur og útilokar ekki að fara til Indlands

Eiður Smári Guðjohnsen, markahæsti leikmaður íslenska karlalandsliðsins frá upphafi, gæti hugsað sér að spila í indversku ofurdeildinni á þessu ári eins og til stóð í fyrra.

Eiður var búinn að semja við indverska liðið FC Pune City en meiddist á ökkla fyrir æfingaferð með liðinu til Spánar og þurfti að hætta við ævintýraferð til Indlands.

„Ég útiloka það ekki. Ég hef ekki formlega lagt skóna á hilluna,“ segir Eiður í viðtali við Sky Sports en hann spilaði síðast fyrir Molde í Noregi á síðasta ári.

„Ég er búinn að vera atvinnumaður í 23 ár en ég hef notið tímans frá fótboltanum síðustu mánuði. Ég held samt öllu opnu. Það voru mikil vonbrigði fyrir mig að spila eki á síðasta ári. Þetta var eitthvað nýtt fyrir mig og öðruvísi.“

Átta lið eru í indversku deildinni og hefur aðeins tekið átta vikur að klára hana frá stofnun deildarinnar árið 2014. Nú verður tímabilið aðeins lengra þar sem að minnsta kosti eitt lið til viðbótar bætist í hópinn.

Deildin hefst í október eftir að Indland heldur sitt fyrsta mót á vegum FIFA en HM U17 ár landsliða fer þar fram í október. Eiður Smári sér fram á betri tíma í indverskum fótbolta á næstu árum en A-landslið þjóðarinnar setti met á síðasta FIFA-lista þar sem það er í 100. sæti.

„Indland á enn þá eitthvað í land þegar kemur að umgjörð og fjárfestingu í fótboltanum en áhuginn virðist vera til staðar. Krikket verður alltaf aðal íþróttin í Indlandi en áhuginn á fótboltanum er að aukast,“ segir Eiður Smári Guðjohnsen.