100.000 árásir á íslenskar IP-tölur á síðasta ári

Hundrað þúsund netárásir voru gerðar á íslenskar IP-tölur á síðasta ári. Ekki er ljóst hvaða áhrif netárásin sem hófst á föstudag mun hafa hér á landi. Forstjóri Póst- og fjarskiptastofnunnar segir að innleiða þurfi nýtt regluverk frá Evrópusambandinu svo Ísland sé betur í stakk búið til þess að takast á við árásir sem þessar.

Mikið hefur verið rætt um útbreiðslu tölvuvírussins WannaCry en tölvuárásin hófst á föstudag með netárásum á breska heilbrigðiskerfið. Vírusinn tók tölvukerfi stofanna í gíslingu og kom af stað bylgju gagnagíslatöku og um tvö hundruð þúsund notenda í hundrað og fimmtíu löndum hafa orðið fyrir árásinni. Hér á landi en sem komið er hafa ekki komið margar tilkynningar til Póst- og fjarskiptastofunnar um smit.

„Við höfum engar staðfestar fregnir af því að tölvur á Íslandi hafi sýkst. Við höfum grun um það að tíu tölvur gætu verið sýktar og við erum að vinna með þjónustuaðilum þeirra sem eiga þessar tölvur eða öllu heldur IP-tölur ,“ segir Hrafnkell V. Gíslason, forstjóri Póst- og fjarskiptastofunnar.

Þeir komu tölvuveirunni af stað hafa krafið einstaklinga og fyrirtæki um andvirði þrjátíu þúsund króna til þess að aflétta læsingu gagna í tölvum og hafa greiðslur farið í gegnum Bitcoin. Samkvæmt heimildum fréttastofu hafa, um allan heim, yfir tvö hundruð tölvueigendur greitt umrætt verð. Þeir sem bera ábyrgð á árásinni láta hins vegar lítið fyrir sér fara því útbreiðslan hefur að öllum líkindum orðið mun meiri en gert hafi verið ráð fyrir.

„Ég held að þetta hafi verið lán í óláni að þetta fór af stað seinni part á föstudegi. Þá fóru kerfisstjórar í raun og vera strax að vinna í því að uppfæra kerfin sín sem hefur minnkað dreifingarmöguleika vírussins,“ segir Hrafnkell.

Hrafnkell segir hins vegar margar tölvur vera óvarðar fyrir smiti þar sem óleyfilegur hugbúnaður er notaður og tölvan því ekki uppfærð.  Til að takast á við árásir sem þessar segir Hrafnkell að nauðsynleg sé að uppfæra þurfi og innleiða nýtt regluverk frá Evrópusambandinu þar sem fleiri þættir verði teknir undir netöryggissveitina. Hlutir eins og fjarskiptafyrirtæki, orkufyrirtæki, fjármálafyrirtæki, samgöngufyrirtæki, heilbrigðisþjónusta og fleiri fyrirtækja og stofnanna.

Árásin um helgina er ekki lokið og enn ekki ljóst hvaða áhrif hún mun hafa.

„Þetta er stærsta einstaka árás sem að við höfum orðið fyrir bæði er varðar gagnagíslatöku og yfirhöfuð. Hins vegar má ekki gleyma því að á síðasta ári þá voru um það bil eitt hundrað þúsund álagsárásir gerðar á íslenskar IP-tölur. Stofnunin vill koma því á framfæri að vakni grunur um smit í tölvum vegna árásarinnar um helgina er áríðandi að það sé tilkynnt til Póst- og fjarskiptastofnunnar í gegnum vefsíðuna pfs.is