Emil lék allan leikinn í jafntefli Udinese og Atalanta

Udinese tók á móti Atalanta á Dacia Arena vellinum í Udine í dag. Emil Hallfreðsson var að vanda í byrjunarliði Udinese í leiknum og lék allan tímann.

Atalanta, sem var fyrir leikinn í 5. sæti deildarinnar, komst yfir með marki á 41. mínútur. Þar var að verki Bryan Cristante. 0-1 var staðan í hálfleik.

Udinese náði að jafna metin á 53. mínútu þegar Króatinn Stipe Perica skoraði, hans sjötta mark á tímabilinu. Fleiri mörk voru ekki skoruð og niðurstaðan 1-1.

Udinese er í 11. sæti deildarinnar með 44 stig eftir 35 leiki en Atalanta er í 5. sæti með 65 stig.