Mark Viðars dugði ekki til

Viðar Örn Kjartansson skoraði mark Maccabi Tel Aviv í 1-2 ósigri fyrir Hapoel Be'er Sheva í úrslitakeppni ísraelsku úrvalsdeildarinnar í kvöld.

Viðar kom Maccabi yfir á 23. mínútu en þetta var þriðja mark hans í tveimur leikjum.

Melikson jafnaði metin fyrir Hapoel á 57. mínútu og einni mínútu fyrir leikslok tryggði John Ogu liðinu sigurinn og ísraelska meistaratitilinn. Viðar var tekinn af velli skömmu áður en sigurmarkið kom.

Viðar hefur nú skorað 18 mörk í ísraelsku deildinni og 23 í heildina á tímabilinu.

Fyrr í dag töpuðu Hólmar Örn Eyjólfsson og félagar í Maccabi Haifa fyrir Beitar Jerusalem, 2-0.