Rúnar Már lagði upp sigurmark Grasshoppers

Rúnar Már Sigurjónsson lagði upp eina mark leiksins þegar Grasshoppers vann 0-1 sigur á Young Boys í svissnesku úrvalsdeildinni í dag.

Munas Dabbur skoraði eina mark leiksins á 82. mínútu eftir undirbúning Rúnars.

Þetta var fimmta stoðsending Rúnars í svissnesku deildinni á tímabilinu. Auk þess hefur Skagfirðingurinn skorað sjö mörk.

Brasilíumaðurinn Caio er eini leikmaður Grasshoppers sem hefur komið með beinum hætti að fleiri mörkum (13) á tímabilinu en Rúnar.

Þetta var annar sigur Grasshoppers í röð en liðið er í 7. sæti deildarinnar með 30 stig.