Rauf skilorð með því að stela mat fyrir þrjú þúsund krónur og skalla starfsmann

Héraðsdómur Reykjavíkur hefur dæmt karlmann til sex mánaða fangelsisvistar fyrir að hafa stolið matvöru fyrir rúmlega þrjú þúsund krónur og skallað starfsmanna verslunarinnar sem veitti honum eftirför.

Atvikið átti sér stað að kvöldi til árið 2015 en nánari dagsetning er ekki tilgreind í dóminum. Lögreglan hafði verið kvödd á vettvang en þegar hún kom þangað var þjófurinn handtekinn á staðnum.

Starfsmaðurinn hafði reynt að stöðva för mannsins þegar hann gekk með vörur fram hjá kassa án þess að greiða fyrir þær. Starfsmaðurinn sagði hinn dæmda hafa byrjað að öskra og sagst hafa skilað öllum vörunum og tekið því næst á rás.

Starfsmaðurinn ákvað að veita manninum eftirför en hafi þá verið skallaður af manninum og hlaut við það blóðnasir og skrámu á nefi.

Sá sem var dæmdur í málinu viðurkenndi fyrir dómi að hafa stolið matvöru. Hann sagðist hafa verið ölvaður og hálfruglaður. Hann sagðist hafa játað verknaðinn fyrir starfsmanninum og viljað fara. Sagðist hann hafa verið nýkominn úr afplánun þegar þetta átti sér stað og því ekki viljað afskipti lögreglu. Hann hafi hins vegar verið eltur af starfsmönnum verslunarinnar. Þegar einn þeirra greip í hann hafi hann streist á móti. Hann kannaðist ekki við að hafa skallað starfsmanninn en sagðist hafa hnykkt til höfðinu sem þá hafi lent á manninum.

Hann sagðist hafa beðist afsökunar og sagði að um óviljaverk hefði verið að ræða sem hann sæi eftir.

Héraðsdómur var á því að maðurinn hefði gerst sekur um bæði þjófnað og líkamsárás í þessu máli. Við refsiákvörðun var litið til þess að hann ætti sakaferil sem næði aftur til ársins 1996 en síðan þá hefur hann fjórtán sinnum verið dæmdur til refsingar, nú síðast á árinu 2014. Í flestum tilvikum var hann sakfelldur fyrir auðgunarbrot en einnig fyrir rán, brot gegn lögum um ávana- og fíkniefni og umferðarlagabrot. Hann hafði ekki áður verið sakfelldur fyrir líkamsárás og var til þess litið.

Hann var á skilorði þegar hann gerðist sekur um þetta athæfi og var því refsing hans ákveðin sex mánaða fangelsisvist.