Lítið mál að smygla á Hraunið

Talsvert minna fannst af amfetamíni, kókaíni og kannabisefnum í fangelsinu á Litla-Hrauni í fyrra en árið á undan. Halldór Valur Pálsson, forstöðumaður fangelsisins, segir að svo virðist vera sem nýja lyfið spice sé notað í staðinn. Samkvæmt tölum frá fangelsinu fundust 170 grömm af efninu í fyrra en ekkert árið á undan.

Á móti kemur að árið 2015 fundust 150 grömm af kókaíni, 90 grömm af amfetamíni og 53 grömm af kannabisefnum. Í fyrra fundust hins vegar 26 grömm af kókaíni, 13,6 grömm af amfetamíni og 11,6 grömm af kannabis.

„Það var óvenju mikið magn af kókaíni árið 2015 sem tengist einu máli. Þetta er ekki dæmigerð tala fyrir magn kókaíns sem við erum að finna hérna,“ segir Halldór Valur.

Hann bendir á að þyngd efnanna miðist við bráðabirgðamælingu sem gerð er á Litla-Hrauni. „En þegar við finnum efni þá gerum við það alltaf að lögreglumáli og þyngdin er bráðabirgðamæling sem við gerum hjá okkur og stemmir kannski ekki endilega við þær mælingar sem lögreglan gerir. Þetta eru áætlaðar tölur hjá okkur,“ segir hann.

Halldór Valur bendir líka á fíkniefnasendingar sem eru stöðvaðar áður en þær koma inn í fangelsið. „Til dæmis ef lögregla stoppar bíl á Hellisheiði og það finnast í honum efni og svo kemur í ljós að hann var á leiðinni á Litla-Hraun,“ segir hann og bendir á að slíkar upplýsingar séu ekki í tölum Fangelsismálastofnunar. Einnig geta efni fundist á stöðum þar sem von er á fanga, í dómsal eða á læknisstofu eða annars staðar.

Halldór segir erfitt að segja til um hve stóran hluta af fíkniefnum sem berast í fangelsið sé lagt hald á. „Ef við finnum mikið af efnum þá er minni neysla eftir á. En við getum ekki fullyrt það hvort við erum að ná 10, 50 eða 90 prósentum.“

Halldór segir að fangelsið geti aldrei komið fullkomlega í veg fyrir fíkniefnasmygl.

„Það er ekkert flóknara að koma fíkniefnum hingað inn heldur en milli landa. Menn fá gesti, það koma öll aðföng hingað utan að og það er ekkert mál fyrir þá sem skipuleggja sig vel að koma fíkniefnum hingað inn eins og annars staðar. Og við viljum ekki að fíkniefnaherferðir hér bitni á mannréttindum manna,“ segir hann. Fangelsið reyni hins vegar að takmarka framboðið um leið og reynt er að bjóða föngum lausnir til þess að komast út úr vandanum.

Fréttin birtist fyrst í Fréttablaðinu.