Forsala á Young Thug hefst á morgun

Forsala á tónleika rapparans Young Thug, sem heldur tónleika í Laugardalshöll þann 7. júlí næstkomandi, hefst á morgun.

Miðasala fer fram á Tix.is og hefst klukkan 10:00. Í forsölu verður eingöngu hægt að versla miða með Aur appinu og forsöluverðið er 8.900 krónur. Miðasala hefst svo formlega klukkan 10:00 á fimmtudag. Almennt miðaverð er 9.900 krónur.

Breska rapptvíeykið Krept and Konan mun einnig koma fram sama kvöld í Laugardalshöllinni.

Sjá einnig: Rappveisla í Laugardalshöllinni í sumar - Young Thug kemur til landsins

Krept and Konan vann meðal annars til verðlaunanna „MTV Brand New“ árið 2015 og stærsti smellur þeirra, „Freak Of The Week” hefur fengið 43 milljón áhorf á YouTube. Sveitin er um þessar mundir á tónleikaferðalagi með Drake og Young Thug um Evrópu.

„Þessir tónleikar verða bara betri og betri. Young Thug er á hápunkti ferils síns og Krept And Konan eru eitthvað það ferskasta og mest spennandi sem hefur komið úr bresku hip-hop senunni á undangengnum árum,” segir Róbert Aron Magnússon þáttarstjórnandi Kronik á X-inu 977 og annar af tónleikahöldurunum.

Ekkert aldurstakmark verður á tónleikana sjálfa en áfengi verður selt á afmörkuðum svæðum á tónleikasvæðinu. Tónleikagestir munu hafa þann möguleika á að sitja utandyra og gæða sér á svokölluðum „street food“ frá hinum ýmsu heimshornum bæði á undan og á meðan á tónleikunum stendur.