Krabbameinsfélagið um gagnrýni á Mottumars: „Það er ekki þannig að allt eigi að fara í rannsóknir“

Krabbbameinsfélagið segir að það fé sem safnist í Mottumars, fjáröflun félagsins, eigi ekki allt að renna til krabbameinsrannsókna. Verkefnið sé fyrst og fremst fræðslu- og árveknisátak.

Sjónvarpsmaðurinn Helgi Seljan gagnrýndi Mottumars á samfélagsmiðlum í dag þar sem hann sagði að árið 2010 hafi aðeins tvær milljónir af þeim 60 sem söfnuðust í Mottumars runnið til krabbameinsrannsókna. Restin hafi runnið til „auglýsingastofa og milliliða.“

Í samtali við Vísi segir Kristján Sturluson, framkvæmdastjóri Krabbameinsfélagsins, það skýrt að fé sem safnist í Mottumars sé ekki eingöngu eyrnamerkt krabbameinsrannsóknum. Þeir fjármunir sem safnist séu notaðir í forvarnir, fræðslu, rannsókn og ráðgjöf.

„Það er ekki þannig að allt eigi að fara í rannsóknir. Án þess að ég hafi það alveg í huganum þá hafa um tíu prósent af innkomunni farið í rannsóknir en síðan hefur þetta farið í starfsemi eins og krabbameinsráðgjöfina, fræðslu og árvekniátak sem þetta átak er. Mottumars er fræðslu og árvekniátak og það fer auðvitað ákveðinn kostnaður í það,“ segir Kristján.

Í yfirlýsingu frá Krabbameinsfélaginu segir að markmið herferðarinnar í ár sé „vitundarvakning og fræðsla en ekki fjáröflun.“

Tíu prósent í rannsóknir

Í samtali við Vísi árið 2015 sagði Ragnheiður Haraldsdóttir, þáverandi forstjóri Krabbameinsfélagsins, að um 50 prósent af söfnunarfénu renni til fræðslu- og árveknistarfa um 30 prósent til ráðgjafarþjónustu Krabbameinsfélagsins sem rekur íbúðir hér í bænum og þjónustuíbúðir úti um landið og ráðgjöf í húsnæði Krabbameinsfélagsins. Um tíu prósent færi í kostnað vegna átaksins og tíu prósent í krabbameinsrannsóknir.

Kristján getur ekki tekið undir að auglýsingastofur og milliliðir fái megnið af þeim fjármunum sem safnist í Mottumars. Krabbameinsfélagið fái mikinn afslátt af auglýsingum og vinnu auglýsingastofa í tengslum við átakið.

Í samtali við Vísi fyrr í dag sagði Ragnar Gunnarsson, framkvæmdastjóri Brandenburg auglýsingastofu gagnrýni Helga Seljan vera út í hött. Tengdi hann gagnrýni Helga við þann hluta verkefnisins sem snýr að rafrettum eða því sem gengur undir nafninu veip.

Vilja ekki meina að rafsígarettur séu ekki skárri kostur

Í tilkynningu frá Krabbameinsfélaginu segir að félagið hafi aldrei haldið því fram að rafsígarettur séu ekki skárri kostur en sígarettur. Herferð Mottumars gegn rafrettum snúi að því að hvetja karla til að velja sér tóbakslaust líf.

„Aðaláhyggjuefni félagsins er að rafsígarettur hafa skotið rótum í skólum og víðar þar sem tóbaksnotkun var áður hverfandi. Nýjustu tölur sýna að rúmlega fjórðungur barna í 10. bekk grunnskóla hefur notað rafsígarettur og helmingur ungmenna í framhaldsskólum á meðan einungis 3% fullorðinna hafa notað rafsígarettur. Þetta er þróun sem er mikilvægt að snúa við,“ segir í tilkynningu Krabbameinsfélagsins.