Sannfærður um að Akranes sigli til Eyja

„Þetta hefur eitthvað verið að þvælast fyrir þeim,“ segir Elliði Vignisson, bæjarstjóri í Vestmannaeyjum, en samgönguráðuneytið mun í dag ljúka ferjumálinu svokallaða. Fundað var í allan gærdag og byrjaði fundurinn um klukkan níu. Ekki tókst að ljúka fundinum með ákvörðun og verður hún tekin í dag.

Samgöngustofa hafnaði beiðni Eimskips um að sigla ferjunni Akranesi til Vestmannaeyja um verslunarmannahelgina. Ferjan hefur verið í tilraunasiglingum milli Akraness og Reykjavíkur, en sótt var um tímabundið leyfi fyrir breytingu á siglingum. Eftir að beiðninni var hafnað sendi Elliði stjórnsýslukæru vegna málsins til samgönguráðherra. Niðurstaða ráðuneytisins vegna hennar komi fyrr en í fyrsta lagi í dag.

„Ég er sannfærður um að þetta mál getur bara endað á einn veg,“ segir Elliði og bætir við að hann lesi lítið í langan fundartíma. „Við hljótum að gera þær kröfur til stjórnvalda, ekki bara til þessara eftirlitsstofnunar, heldur til allra stofnana að ákvarðanir séu teknar á málefnalegan máta og fólk hafi á tilfinningunni að réttsýni blasi við en ekki að geðþóttarök séu notuð eins og meint ástand á farþegum. Það hleypti verulega illu blóði í okkur að forstjóri Samgöngustofu (Þórólfur Árnason) skyldi leyfa sér það að segja svo. Við sem höfum sótt Þjóðhátíð í hartnær hálfa öld, eins og ég hef gert, vitum að Þjóðhátíð hefur breyst og ungt fólk í dag er langtum meira og betur til fyrirmyndar en kynslóð Þórólfs var og mín reyndar líka.“

Eins og sjá má í svari Páls Magnússonar þingmanns finnst honum rökstuðningur Samgöngustofu vera fullur af innbyrðis mótsögnum og óskiljanlegur í samhengi hlutanna. Elliði tekur undir þessi orð. „Mér finnst þessi eftirlitsstofnun í þessu máli hafa farið algjörlega framúr sér. Það er hreint óþægilegt fyrir okkur sem eigum svona mikið undir í samgöngum að geta ekki gengið að þessu kerfi sem sanngjarnara og vandaðra.“

Eimskip sótti um leyfið fyrir um mánuði og Vestmannaeyjabær kom inn í ferlið á síðari stigum. „Þetta er svo mikilvægt fyrir okkur að við verðum að verja hagsmuni okkar og munum gera það eins lengi og þurfa þykir,“ segir Elliði. Aðspurður hvað gerist ef ákvörðun ráðuneytisins verður neikvæð segir hann að það séu fleiri fyrirtæki í útsýnissiglingum á Íslandi. „Við munum klárlega hvetja alla til að leita fyrir sér með flutninga í farþega- og útsýnissiglingu í kringum Vestmannaeyjar.“

Hann segir að þetta snúist ekki aðeins um að gera Þjóðhátíð sem stærsta og mesta. Hún verði alltaf glæsileg og verði eftir í minningum fólks ár eftir ár. „Þetta snýst um að auka þjónustu fyrir gesti okkar og líka að við sem eyjasamfélag, sem á allt undir í samgöngum, sitjum ekki undir svona óvönduðum og geðþóttafullum ákvörðunum.“