Ari lagði upp jöfnunarmark Lokeren

Landsliðsbakvörðurinn Ari Freyr Skúlason lagði upp jöfnunarmark Lokeren í 1-1 jafntefli gegn St Trudien á heimavelli í belgísku deildinni í fótbolta í kvöld.

Ari var á sínum stað í byrjunarliði Lokeren og lék allar 90. mínúturnar í leiknum en Gary Martin, fyrrum framherji ÍA, KR og Víkings, kom ekkert við sögu vegna meiðsla.

Jordan Botaka kom gestunum yfir á 47. mínútu en tíu mínútum fyrir leikslok jafnaði Robin Soder metin eftir sendingu frá Ara. Reyndist það vera síðasta mark leiksins en gestirnir fengu rautt spjald í uppbótartíma.

Var þetta annað jafntefli Lokeren í síðustu fjórum leikjum en Lokeren hefur hægt og bítandi verið að klífa upp töfluna undanfarnar vikur eftir slakt gengi í upphafi tímabilsins sem kostaði Rúnar Kristinsson, þáverandi þjálfara liðsins, starfið.