Segir starfsmenn hafa brugðist hárrétt við eldinum

Sveinbjörn Sigmundsson, verksmiðjustjóri í fiskmjölsverksmiðju HB Granda á Vopnafirði, segir að viðbrögð starfsmanna fyrirtækisins hafi verið hárrétt þegar eldur kom þar upp í morgun.

„Slökkviliðsstjórinn mat það þannig á leiðinni að rétt væri að kalla einnig út slökkvilið frá Þórshöfn og Egilsstöðum en það kom fljótlega í ljós að það var sem betur fer ekki þörf fyrir þann liðsstyrk,“ segir Sveinbjörn í frétt á vef HB Granda. Hann minnir á að aldrei sé of varlega farið þegar eldur er annars vegar.

Sjá einnig: Eldur í verksmiðju HB Granda

„Það sem gerðist var að við létum opna reykrör, sem liggur frá þurrkara, til að geta þrifið það. Við það hljóp neisti frá slípirokki í mjölleifar sem voru í rörinu og staðbundinn eldur kom upp. Okkar fyrstu viðbrögð voru að útiloka að súrefni kæmist að eldinum og síðan var hann slökktur með vatni,“ segir Sigmundur.

Á vef HB Granda kemur fram að að dagana á undan hafi orðið vart við ákveða tregðu í loftflæði um reykrörið og því hafi tækifærið verið notað til að opna rörið um leið og verksmiðjan var þrifin.

„Það var lokið við að vinna kolmunna í verksmiðjunni í gærmorgun. Við þrífum verksmiðjuna hátt og lágt þegar hlé verður á vinnslunni og það voru slík þrif í gangi þegar eldurinn kom upp í mjög takmörkuðu rými. Það gerðist upp úr klukkan átta í morgun og slökkviliðið var farið héðan kl. 10.30,“ segir Sveinbjörn Sigmundsson.