Eldur í verksmiðju HB Granda

Eldur kom upp í fiskimjölsverksmiðju HB Granda á Vopnafirði í morgun. Talið er að eldurinn hafi komið upp í þurru mjöli og var hann staðbundinn í reykröri í mjölturni verksmiðjunnar. Slökkvilið Vopnafjarðar er enn að störfum en hefur náð tökum á eldinum. RÚV greindi fyrst frá.

Fólk var að störfum í verksmiðjunni þegar eldurinn kom upp en engan sakaði. Um nokkuð viðamikið útkall var að ræða en Brunavarnir á Héraði og slökkvilið Langanesbyggðar voru ræstar út vegna eldsins. Sem fyrr segir hefur þó tekist að ráða niðurlögum eldsins og var því hluti viðbragðsaðila sendur til baka.